भातुकली
" ए आजी , आपण घर-घर खेळायचं आहे आज , तू झोपायचं नाही हं ", नातीचा हुकूम सुटला आणि मी झोपेला 'टाटा ' म्हंटलं . तिची आई भिशीला जाणार म्हणून मला माझ्या आवडीचं बेबी-सीटिंग करायला मिळणार होतं ! " तू बाळ, आणि मी आई " "हो चालेल, मी झोपते चुपचाप " मी म्हटलं . " ए नाही गं , तू खेळणारं बाळ आणि ही जोजो 'झोपकं' बाळ , असं म्हणून तिने जोजो नावाच्या तिच्या बाहुलीला झोपवलं . डोळे मिटते म्हणून ती जोजो .. पण ती आहे अत्यंत भेसूर ! तिचा एकच डोळा उघडतो , एक वेणी नेहमी सुटलेली असते , आणि तिच्या चेहऱ्यावर ह्या बाईसाहेबांनी लाल आणि काळ्या स्केच पेनने बराच मेकअप करून ठेवलाय ! पण ती हवीच. तिच्या शिवाय खेळ सुरूच होत नाही. तर ही छोटीशी आई , घरभर हिंडून खेळ गोळा करत होती, आणि संसार मांडत होती . मला एक खूपच सुंदर कविता आठवली . " चंदनाच्या विठोबाची माय आज घरी गेली " !...