My मराठी - ४

    आपली भाषा फार मस्त आहे, प्रेमळ आहे, श्रीमंत आहे, एका शब्दाचे अनेक अर्थ आणि एका अर्थाचे अनेक शब्द ! सरळ बोलतांना थेट 'टार्गेट' वर, तिरकस बोलतांना उंटाला भारी ! बुद्धिबळातला उंट  !    काना मात्रेच्या फरकानी ,  वेलांटीच्या वळणानी , अर्थाचा अनर्थ, राईचा पर्वत तर कधी कधी काही तरी वेगळंच !     मुलांशी बोलतांना हे खूप जाणवायचं ! जे आपल्याला लहानपणी सहजगत्या समजलं, ते महाराष्ट्राबाहेर मुद्दाम शिकवावं लागलं, आणि खूप मजा यायची ! आपल्याच भाषेची ही मनमानी फारच मजेशीर ! कधी हसून हसून पुरेवाट तर कधी डोक्याला हात लावून बसायची वेळ ! त्यात मला तिरकं बोलायची सवय ! मग तर विचारूच नका !

    एकदा दिवाळीच्या सुमाराची गोष्ट ! मी काय काय करायचं, कोणा कोणाला बोलवायचं वगैरे यादी करत होते. तर नवऱ्याला म्हटलं, " अरे, त्या आपल्या ह्यांना या वेळी फराळाला बोलवायचंय " , लगेच मुलगा म्हणाला,  "असं काय म्हणतेस ?  एवढं आवडत नसेल तर बोलवू नकोस !" मला कळेचना, हे काय ? मग तो म्हणाला,      " फराळ हा काय चांगला शब्द असतो का ? आम्ही बिस्किटं खायला लागलो की तू म्हणतेस ना ,आता फराळ पुरे !"  मी हतबुद्ध !

    दोर - दोरा - दोरी ... घोळच घोळ.  एकदा मुलगा म्हणाला, " आई, पैजाम्यातल्या दोरीचं टोक आत गेलं "     " दोरी म्हणतात का त्याला ?"  " बरं , दोरा . "  " नाही रे बाबा "   पण ते मी तेवढ्यावरच सोडलं. कोण बसणार समजावत !

    एकदा मैत्रिणीच्या मुलीचा फोन आला, " हाय मावशी, काल पुण्याहून आले परत. आईने तुझ्यासाठी खुंट  दिलेत."            

 " खुंट?  पुण्याहून ?"         

" हो"         

" अगं  पण इथे काही पूजा बिजा नाहीये. खुंट कशाला ?"        

" ते नाही माहीत. पण पूजेलाच खुंट लागतात का ?"       " बरं  आण तू, मग मी बघते ..."        

" हो, जमलं तर उद्याच येईन, नाहीतर मग next week "       

 " अगं तोपर्यंत वाळतील ना ते "       

 "छे गं, पेंट पूर्ण  वाळलाय, फोल्डींग आहेत ते !"        " folding खुंट ? ...."      मी विचारातच !      नंतर उलगडा झाला ! त्या folding खुंट्या होत्या, एक अडकवली की  चिमणाळ्यासारखे ६ hooks  मोकळे व्हायचे !

    सगळ्यात मजा आली, बहिणीला नातू झाला तेंव्हा !     नातू परदेशी ! आम्ही दोघी भाच्याशी video chat  करत होतो. काय काय न्यायचं, काय नको, बारसं कसं आणि कधी, त्याची तयारी वगैरे.     तर भाचा म्हणाला, 

" आई, ही सांगतेय ती सगळी तयारी तू आण."     

" ok "     

" एक कुंचा आण ..."    

 " कुंचा कशाला ? "    

 " तुझी सून म्हणते बारशाला लागतो, बाळाला पाळण्यात ठेवतांना घालतात ..."       

 " you mean घालतांना ठेवतात ..."   

  " अरे पण तो वरवंटा, कुंचा नाही, कुंचा लक्ष्मीपूजनाला लागतो ..."      

  " नाही गं , कुंचाच हवाय , "      

 " थांब, तू इंग्रजीमधे सांग बरं काय हवंय ते ..."        

 " ok, ती म्हणतेय , it is like hoodie ..." 

" hoodie !!!...   ती कुंची रे बाबा, कुंची ... कुंचा कोणी नाही घालत  !"     

" same ना, छोटी ती डबी, मोठा तो डबा तसंच .   पण जरा मोठा size  आण ,  आपलं बाळ चांगलं  धष्टपुष्ट आहे ..." 

इथे आमची हसून हसून मुरकुंडी वळली होती ...