लघु शब्द

  

        Abbreviation : एका मोठ्या शब्दाच्या लघु रुपाला केवढा मोठा  शब्द !  खरं तर शॉर्टफॉर्म म्हणावं ! पटकन कळतं !

   नुकतंच WhatsApp वर  एक फॉरवर्ड आलं होतं .   वर मथळा होता 'पापोचाकुकुची ' !  म्हंटलं , साऊथ अमेरिकेतल्या एकाद्या डोंगराचं नाहीतर तसलंच कशाचं वर्णन असेल. तिथे अशीच नावे असतात. माचु पिचु , पोपोकॅटॅपेटल वगैरे .  उघडून पाहीलं , तर एका पॅकेटचा फोटो होता. त्यावर हे लिहिलेले.  खाली विस्ताराने लिहिले होते ' पातळ पोह्यांचा कुरकुरीत चिवडा ' !      

    सतत काहीतरी,  कधी कधी , काहीच्या काही तरी, काढत असतात.  हा काय शॉर्ट फॉर्म झाला  ? अजूनही लहान करता आलं असतं ! पापोचि चाललं असतं !! आणि , मग आठवलं, आपणही शाळेत असतांना असेच  'लघु शब्द'  वापरायचो !   तेव्हांचा असाच एक आवडीचा लघुशब्द म्हणजे ' श्रीबालाजीचीसासू '  ! नुसता विचार केला तरी तोंडाला पाणी सुटायचं !   पण त्यात पुरणपोळी, उकडीचे मोदक, करंजी यांची वर्णी लागली नाही म्हणून जरा वाईट पण वाटायचं !  आणि  ते मिळवून घेणं कोणालाच अजूनही जमलेलं नाही !

   लहानपणी , रोज सकाळी वडील ऑफिसला जायला निघाले की  पेन, रुमाल, चाव्या, पाकीट, आणि पास  अशी उजळणी करूनच निघायचे . पेरुचापापा !! त्या काळच्या सर्व मराठी भाषिक घरात  ' पेरुचापापा '  हा रोजचा कार्यक्रम असणार ! आणि घरोघरी असे खूप लघुशब्द ही तयार होत असणार !!

    इथे बंगलोर मधे काही वर्षांपूर्वी  tourists करता एक नवीन बस सेवा सुरु झाली. बंगलोर दर्शन ! सगळी प्रेक्षणीय स्थळे जोडणारा एक route ! एक दिवसाचं तिकीट काढायचं आणि त्या बस मध्ये  बसायचं .   हवं तिथे उतरा , हवा तितका वेळ स्थळ पहा, अन् पाहून झालं की पुढच्या बस मध्ये  बसा नी  पुढे जा.   ही बस साधारण दर अर्ध्या तासानी असायची. Idea  छान होती  , ह्या बसचं नाव होतं  'हो-हो बस' ! वाटलं ,   बहुतेक इथली बस सर्विस हा विनोदाचा विषय आहे हे लक्षांत आलं असावं !  आणि  'हा-हा क्लब'  आधीच अस्तित्वात असल्याने  'हो-हो बस'  म्हटलं असेल !  नंतर कळलं की ते   'Hop On Hop Off '  असं होतं . पण शॉर्टफॉर्म मस्त होता ! Ho-Ho बस !!!....

    नुकतीच झालेली गंमत ! मागच्या वर्षी पहीला लॉक डाउन  संपल्यावर एक दिवस मोठा मुलगा , आम्ही कसे आहोत ,  हे पहायला आला. आम्ही नुकतेच बाजारात जाऊन आल्यामुळे सगळ्या वस्तू, पाकीटे, भाज्या इ . इ . धुऊन पुसून , corona - dry  करायला टेबलवर पसरवून ठेवल्या होत्या . तो सर्व बघत होता. मग चहा पितांना म्हणाला, " By the way , तुमची health कशी आहे? "

" का ? चांगले टुणटुणीत दिसतोय की आम्ही ! आणि सगळी कोरोना सूत्रं  पाळतो म्हंटलं ... "        त्यावर तो म्हणाला,  " I mean, financial health ?"            "ऑ ?...."           

 "नाही, इथे खूप बोगो  गोष्टी दिसताहेत ..."        

" बोगो म्हणजे ? काही नवीन ब्रँड आहे का? लेबल पाहील्याचं आठवत नाही मला ..."        

" बोगो  म्हणजे Buy One Get One फ्री !   एकेकाळी तुम्हाला ते पटायचं नाही . तुम्ही म्हणायचात  " त्याची खरी किंमत अर्धीच असेल !  उगीच कोण कशाला काही free  देईल?  There  is  no  free  lunch ....."  तुम्ही अशा ऑफर्स बघायचां पण नाहीत ! "     

" अरे आता दुकानात तेच असेल तर आम्ही तरी काय करणार?   बाकी BOGO ... मस्त आहे हं शॉर्ट फॉर्म ! "

    ... आणि त्यानंतर अगदी परवाचीच गोष्ट! धाकटी बहीण पाहुणी आली होती.   काही कामानिमित्त माझा नवरा बाहेर जायला निघाला होता. तशी ती म्हणाली, "दादा, 'मोरूचा मासा' घेतला का? "        

"म्हटलं , ही  काय आता नवीन भानगड, का काही कुडमुडं - जडी बुटी, कशाचं नख ,हाड, वगैरे?  अपघात , संकट , रोग-राई , वगैरे घालवायची युक्ती ?" ती म्हणाली, " हं , तसंच काहीसं . अगं , आता आपला 'पेरुचापापा'   जुना झाला, आता   'मोरूचा मासा'  असतो ! मोबाईल , रुमाल, चाव्या, मास्क आणि सानिटायझर ! ....."

......अगदी latest short form  बरं का !.......