अजायबघर
हिंदीमधे म्युझियम ला अजायबघर म्हणतात. अजब गोष्टी - काही जुन्या, काही खूप जुन्या ... अशा वस्तू जगात होत्या, आणि त्या दररोजच्या जीवनात , किंवा काही स्पेशल कार्यक्रमात लागत होत्या हे खरं वाटणार नाही ... तर अशा आता कालबाह्य झालेल्या अजब गोष्टी जिथे असतात ते 'अजायबघर ' ! म्युझियम म्हटलं की खूप शांतता, अगदी तुरळक लोक, मोठमोठ्या काचेच्या पेट्या - कपाटं आणि त्यात दूर दूरच मांडून ठेवलेल्या चित्रविचित्र वस्तू असंच चित्र डोळ्यांसमोर येतं. एक लायब्ररीत आणि नंतर वस्तुसंग्रहालयात ( हो, म्युझियमला मराठीत 'वस्तुसंग्रहालय ' म्हणतात ) मधेच कोणीतरी " Shh ..." म्हणून सांगतात, जणू काही जोरात बोललं तर तिथल्या वस्तू झोपेतून उठून चालायला लागतील... मला आठवतं ते पहिलं म्युझियम - अजायबघर नावाचंच म्हणजे नागपूरच्या महाराज बागेतलं म्युझियम ... तिथे काय होतं ते काही आठवत नाही, पण नाव मात्र खूप आवडायचं. दुसरी आठवण म्हणजे सांगलीच्या शाळेच्या लगतच...